Janus – ne muzikalen theaterveurstelling in ’t Achterhooks dialect

Stichting Passie veur Cultuur en Maatschappij presenteert op 31 maert 2026 de theaterveurstelling Janus. Het is een eigentieds en herkenbaor verhaal, vol passie, in de Achterhooksen streektaol. Stichting Passie veur Cultuur en Maatschappij verzorgen veurgaonde jaorn veurstellingen onder de name Passion Achterhoek. Janus is hier ne afgeleide variant van. Ook Janus is een verhaal vol passie, met völl’ bekende elementen uut dat ‘andere’ passieverhaal. Met dank aan ondersteuning van het ECAL.

Het is good mis in den Achterhook! Der bunt grote plannen veur ne greunen tookomst. Wee zal daor baeter van worden? En wee betaalt daor dan de pries veur? Dat betekent: steggeleri’je in het dorpscafé. Kö-j iederene wal geleuven? Janus is zo een eigentieds verhaal ovver dreumen van ne baetere weld. Maor ook een verhaal met twee gezichten. Wat is het waore gezichte van de leu achter al dee mooie waorden?

Janus is tegeliek ok een verhaal van alle tieden: ovver de kracht van kammerräö en trouw, ovver list, bedrog en verraod. Bunt leu wal wee ze zegt te wezzen? Ovver de pries van ‘naoberschap’ en ovver leu dee veurop dörft te gaon en de kop bovven het maaiveld uitstaekt. Wee steet aan welke kante, as der raekeningen betaald gaot worden?

De veurstelling wördt muzikaal ondersteund deur een combo o.l.v. Stef Woestenenk, met ne Achterhookse invulling van muziek van The Beatles.

Dizzen veurstelling zal worden op-evoerd in theater De Storm, in Wenters. Op dinsdag 31 maert geet de zaal los veur ne meddagveurstelling en ne aovondveurstelling.

De meddagveurstelling (zonder pauze) begunt um 15.00 uur. Op dizze wieze hoppe wi’j iederene wee ’s aovonds lever de deure neet meer uutgaot ne prachtigen theaterbelaeving te bezorgen. Kaarten veur de meddagveurstelling bunt te koop bi’j kantoorbookhandel Meneer Kees, adres: Varkensmarkt 8A in Lichtenvoorde. De kosten bunt € 20,00 per kaartje.

De aovondvoorstelling, um 20.15 uur, (met pauze) is veur iederene. De vri’je kaartverkoop löp via theater de Storm: www.theaterdestorm.nl/voorstelling/janus

Janus: ne veurstelling met twee gezichten én ne veurstelling um neet te missen! Goodgaon!